لـــــــو مســــــــــكت فيـــــــــــــه...هتشـــــــــــــــوفه..!!
~~~~~~~~~~~~~~~~~~~~~~~~~~~~~~
كلنا عارفين قصة تلميذى عمواس ومش محتاجين أفكركم بيها..
بس اللى لفت نظرى النهارده..نُص آية صغيرة بس إتعجبت منها جداً..!
لما يسوع ظهر لتلميذى عمواس وبدأ يفسر لهم كل اللى قالوه الأنبياء بخصوص صلبه وقيامته..بدأ النهار يميل ودخل عليهم المساء..
ويقول الكتاب :
"ثم اقتربوا إلى القرية التي كانا منطلقين إليها، وهو تظاهر كأنه منطلق إلى مكان أبعد " لو 24
عجيبة جداً..!!!
يسوع إتظاهر أنه ماشى وهيسيبهم لأنهم خلاص وصلوا قريتهم..!!
طيب يايسوع دول لسه مش عارفينك!!
دول لسه ماإتفتحتش عينيهم!!
دول لسه رايحين عمواس ومش راجعين تانى أورشليم!!
دول هيرجعوا يحكوا عنك بس كذكرى حلوه بس راحت!!
ده إنت وضبت قلبهم خلاص يارب.. وبقى قلبهم ملتهب فيهم..!!
ده وقته تقول لهم أنا ماشى سلام؟!!!
ولولا إنهم ألزموك ومسكوا فيك تدخل بيتهم وتاكل معاهم..كان زمانهم فوتوا فرصة أن عينيهم تتفتح ويعرفوك ويرجعوا يبشروا الناس كلها بيك؟!!
* ياسلاااااااام ياربى..كتير بتعمل معايا كده..كتير أسمع عظة جميلة عن التوبة..كتير تبعتلى كتاب حلو يعزينى..كتير أشوفك فى شخص حياته منوره بيك..كتير أدخل أعترف وأقدم توبة..كتير قلبى يلتهب فيا...وبعدين؟!!
* وبعدين للأسف.. أرجع بيتى..وأدخل مخدعى.. وأنسى أمسك فيك وأنسى ألزمك تمكث معى الليلة دى..وأنسى أسهر آكل كلامك الحلو فى كتابك..فيبرد قلبى وتظل عينايا مغلقتان لا تراك..وأظل أتعجب لماذا لم أراك؟! وأين ذهب إلتهاب قلبى؟!
وأنت لاتزال تحترم إرادتى..ولا تفرض عليا دخولك مخدعى..وتتظاهر بالذهاب لكى أتعلق بك..وأتشبث فيك..وأنا أضيع على نفسى فرصة رؤياك والأكل معك..
* ولسه يسوع واقف على باب قلبى وقلبك بيقول:
افتحي لي يا اختي يا حبيبتي يا حمامتي يا كاملتي لان راسي امتلا من الطل وقصصي من ندى الليل ..!!
أمكث معى يايسوع >>>>>> آميـــــــــــــــــــــن..
السبت يناير 23, 2016 10:53 am من طرف نجوى نجوى
