الخطوه الاولى ادى نفسك الفرصه لتشعرى بمشاعرك السلبيه ابكى ؛ اغضبى ؛احزنى؛ اكرهى ؛ كل ده تمام
لانك لو قاومتى مشاعرك هتقاومك وهتحسى بالمشاعر السلبيه مسيطره عليكى اكتر بس احنا هنعمل حاجه جديده انتى هتدى نفسك وقت معين تحسى فيه بالمشاعر دى يعنى ممن تقولى انا هدى نفسى يوم احس فيه بالحزن وبعدين هرجع لحياتى الطبيعيه تانى .بكده انتى سمحتى لنفسك تمرى بالمشاعر السلبيه من غير مقاومه وكمان انتى خدتى وقت انك تسمعى عقلك وجسمك محتاج يحس بأيه وهتتفجأى انك قبل الوقت اللى حددتيه رجعتى لحالتك الطبيعيه من تانى.
الخطوه التانيه احكي مشكلتك لحد يكون قريب منك ومصدر ثقه يعنى فضفضى لحد قريب منك . انك تعبرى عن مشكلتك باستخدام صوتك ده مهم جدااااا . فوايده كتير ؛بيديكى قوه ؛ ممكن الشخص يكون عنده نصيحه كويسه ليكى ؛ وحتى لو مكنش عنده حاجه يقولهالك هتحسى بشعور افضل بعد ما تخرجى اللى جواكى وتعبرى عنه بالكلمات ؛ حاجه تانيه ممكن تحصل انك وانتى بتتكلمى وبتسمعى نفسك توقفى كلام وتندهشى وتقولى ايه ده معقوله انا كنت زعلانه علشان كده وتحسى ان الموضوع مش بالحجم اللى انتى متصوراه .
الخطوه الثالثه واجهي اكبر مخاوفك اكيد المشكله اللى بتوجهك سببها خوف ؛ كل المشاكل اساسها الخوف ؛ الخوف من خساره شخص معين ؛ الخوف من خساره وظيفه ؛ الخوف من خساره احترام الناس ؛ الخوف من خساره حب الناس وهكذا .
اكتبى فى ورقه ايه اكبر مخاوفك عن المشكله اللى بتواجهك واتخيلى انها فعلا حصلت وانك خلاص مش خايفه من حاجه . دلوقت فى ورقه تانيه حولى مشكلتك لهدف فمثلا لو كانت مشكلتك انك عايزه تخسى30 كيلو ؛ اكتبى انا هدفى اخس 30 كيلو بكده حولتى مشكلتك لهدف وهكذا . بكده بقت مشكلتك هدف ومبقاش يتقال عليه مشكله وده هيديكى قوه .
الخطوه الربعه قسميهم علشان تهزميهم . بمعنى انتى دلوقت حولتى مشكلتك لهدف؛ جزئى الهدف ده الى اهداف صغيره
اعرفى ايه هى المشاكل الصغيره اللى سببت المشكله الكبيره واهزميها واحده واحده .فمثلا انتى عايزه تخسى 30 كيلو سبب زياده وزنك ممكن يكون انك بتكلى كتير فى العشاء بعد الساعه ثمانيه بالليل يبقى هدفك انك تمنعى الاكل بعد الساعه ثمانيه ومتكليش كتير على العشاء ؛ بشرب بيبسى كتير يبقى هدفى اقلل شرب المشروبات الغازيه ؛ مش بتحرك كتير يبقى هدفى انى اتحرك وامارس رياضه او على الاقل رياضه المشى وهكذا .
اى مشكله تواجهك هاتى ورقه واكتبى الاسباب الصغيره اللى سببتها وابدئى حوليهم لاهداف واهزميهم واحده واحده
الخطوه الخامسه متحاوليش تهزميهم كلهم فى وقت واحد اكيد هتخسرى وهتحسى بالفشل . انتى حولتى مشكلتك لهدف وجزئتيه لاهداف صغيره انتصرى على كل واحد لوحده وخدى وقتك يعنى مثلا فى مشكله زياده الوزن متمنعيش المشروبات الغازيه وتقللى اكلك وكمان تلعبى رياضه وتخدى ادويه تخسيس كله فى وقت واحد؛ علشان هيسببلك ارهاق وضغط نفسى وهتلاقى نفسك استسلمتى وحسيتى بالفشل لكن خدى هدف واحد واستمرى عليه لحد ماتحققى الانتصار التام وادخلى على الهدف اللى بعده وهكذا فى باقى المشكلات اللى بتواجهنا
الخمس خطوات دول ممكن نستخدمهم فى كل مشكله بتواجهنا مشكله ماليه ؛ مشكله فى تحسين علاقتنا بالاخرين او اى مشكله بتواجهك واتمنى ليكم كلكم حياه مليئه بالسعاده والصحه والحب
شكرااا على مروركم الكريم